Del 1924 Ernst Friedrich dèsc fora a Berlin sie liber “Vera a la Vera!”. Più tèrt l’averc n museo sui orores de la Gran Vera che é stat purampò serà dai Nazisć del 1931.
Friedrich, pazifist, anarchich e obietor de coscienza, l’é politicamenter contra l capitalism, cauja – a sie dir – de duta la veres. Ma aldelà de sia posizion politica pisson che l coraje zivil che l’à desmostrà tel meter te dant ai eies de duc l resultat reèl, cruf, soul e indiscutibol de la vera abie n valor assolut.
La fotografìes rejona enstesses. Sie curc comenc no lascia post a l’interpretazion: l’é na soula e unica verità su la vera.
Vardan chesta regoeta de veia fotografìes, smarides e zenza color, no arede nesciun dubie.
L’é fotografìes che per solit se tegn sconetes, che tropes no vel veder, che a tropes ge fèsc aric o tema. Chesta fotografìes l’é la realtà: la vera l’é chest. I lesc chiò dintorn é stac teater de massacres e padimenc.
Padimenc scì gregn che amò i lascia segnes visiboi e concrec.
I omegn del ’14-’18 no i é più: resta i monts suté per aria, sbujé, ciavé fora, combatui, odié e amé.

[...]
Gé, che adinfal vegne definì “todesch” enveze che demò “esser uman”, fae apel a la teres giacèdes del Nord, a l’Africa, a l’America, a l’Asia e a duta l’Europa, e cighe chesta soula paroles a duc chi che pel sentir: umanità e amor. Descheche vaa e padesc, grigna e l’é content n australian, ence tu, fra, eschimeis, african o cineis che te sies, e ence gé, duc vaon e padion a la medema vida, duc grignon dal content e sion aiegres. Ajache duc i omegn é contenc e padesc valif, combaton duc adum contra la vera, nemich orendo.
Proteston ensema e se meton adum vaan contra chest maladet massacher, de chel che duc aon valiva colpa. Ma cognon ence sperèr te n’èlba de pèsc e ledeza: viva la patria de duta la patries, la patria de l’umanità!

Ernst Friedrich






L liber de Ernst Friedrich “Guerra alla Guerra!”
(titol originèl: Krieg dem Kriege!)
l’è dat fora da Oscar Mondadori, 2004

I retrac che vedarede i moscia foradret la realtà de la vera, zenza filtres ne retorica. Friedrich, defat, no vel portèr dant retrac su la vera, te vèlch maniera filtré, ma retrac de la vera, a outes ence con violenza, con sia verità senestra e zensurèda, chela de diesc milions de morc a cajon de la fam, di stenc, de la bombes, de la mines e de la esecuzions; chela de sudé trac te fosses comunes, de militères doventé biota cèrn da canon, mutilé, roiné, de jent famèda, de femenes violentèdes…
Tras chesta galarìa la paroles tol sù endò sie segnificat più autentich, più dret, più terìbol, per no desmentièr mai che che l’é la vera, aldelà de ogne bujìa, faussità, pregiudizie o convinzion.

Sia Maestà l’Emperador é stat content de ge dèr l’Orden al merit (per merit straordenèr) a nosc gran eroe aeronautich… en ocajion de sia setima vitoria aerea

Se vesc omegn é massa deboi, vo sarede bones!
Desmostrà che l sentiment e l'amor per vosc compagn é più forc che ogne chiamèda a la èrmes!
No lascià che vesc omegn vae al front!
No fornì sù i schiopes con fiores!
Tacave al col de vesc omegn, e no i lascià se n jir, nience canche rua la cartolina de prezet!
Sbregà sù la scines, trajeve dedant la locomotives!

Cognede esser bones vo, femenes,
se vesc omegn é massa deboi!

FEMENES DE DUT L MOND meteve adum!

Ernst Friedrich
a la fin de messèl del 1924

D’istà se pel jir a veder la sezion sa mont “Vera a la Vera!”, metuda fora te n cougol spetacolèr te la postazion talièna loghèda sun Sas de Costabela, Auta Via Bepi Zach – Bruno Federspiel, Crestes de Costabela, Pas de Sèn Pelegrin.
Per arjonjer la postazion se va su per scèles de legn bon adortes, con fornimenta aldò (sforzin e moscheton) e bona preparazion alpinistica.
I compagnadores del teritorie e i volontadives de la sociazion “Sul Fronte dei Ricordi” é a la leta per vijites vidèdes en segureza.